निळेशार वाटे हे आभाळ सारे

निळे वाहते पाणी त्याखालूनी

कुण्या गावचा पूल दोन्ही किनारे

पहा जोडतो पाय तो रोवूनी

निळ्या डोंगराच्या पुसटत्याच रेषा

फिक्या होत जातात क्षितिजातूनी

निळ्या या नभाने उधळून द्यावे

निळे दान अपुल्याच हातातूनी

निळी होत जाते मी डोकावताना

निळ्या खोल डोहातली होऊनी

नदीच्या तळाशी कुठे खोल आर्त

निळे सूर येतात पाण्यातूनी

दिशा होत जाता निळ्या सावळ्याशा

निळे रंग येतात स्वप्नातूनी

तुझी होत जाते तशी वाहताना

प्रवाहात माझ्या मी गाण्यातूनी

-विनायक कांबळे